性價比高 廚師發辦Omakase

廚師發辦Omakase相信大家都試過唔少，但在美女廚房品嘗你又試過未？說的是靚女廚師Rachel的私家廚房Rachel Kitchen，最近她便特意舉辦幾場廚師發辦Omakase，並請來蔡展祺師傅炮製美食，而她更化身成蔡師傅左右手，呢個餐單名為「松」和食，聽個名都知是食日本新鮮美食，每道菜好有水準，性價比高，大家記住訂位，不妨一試呀! 最正是一坐低便來個日本桃酒，香甜又美味。

前菜有鮟康魚肝，入口即溶，有陣陣魚肝香味，吃時沾一點微酸的味噌醬，真是好味，再食埋去皮的番茄仔酸酸甜甜好醒胃。

炸公魚(Iwasaki) 我真是大鄉里，第一次食呢日本隻Iwasaki，以春卷皮包住炸到外脆內嫩，充滿骨膠原，口感特別，超好味。

今日空運到港的幾款刺身，有我至愛的白肉劍魚，白色的肉色，脂肪含量多，入口好肥美呀！大大件藍鰭吞拿魚大腩，就是刺身中之極品，蔡師傅仲取最肥美之魚腩，呢部份拖羅佈滿精緻的魚油花紋，入口即溶的口感，油香四溢，在口中久久不散。仲有深海池魚，脂肪結實、肉質肥嫩，口感順滑又鮮甜；牡丹蝦可算是知名度最高的一種，入口甜美的蝦肉，豐腴甘香的蝦膏，甘甜濃郁，餘味悠長好美味。食時加埋即磨日本山葵配上自家製醬汁，鮮味有加，回味無窮。

天婦羅花竹虾，則取上等的品種，外脆蝦味濃鮮、肉質彈牙，超甜。天婦羅鮮蘆筍，蘆筍清甜好味，仲有本地鮮帶子天婦羅，大大件好有口感。

煮物日本野菜內有日本大根(蘿蔔)、日本南瓜、日本毛茄及日本舞茸南瓜，各款配料吸收晒煮物的湯汁，非常入味，連湯都吞晒落肚，真是好滋味。

日式茶碗蒸吃起來入口軟滑，關鍵就在水份和蛋的比例，以自家製的清湯代清水，份量以蛋的重量來調節，再放入松葉蟹肉、銀杏、百合及日本本菇，入口菇香樸鼻充滿蛋香，仲有松葉蟹肉的鮮甜味，蛋香又滑溜。

火炙和牛肉，經過火炙的牛肉，入口肉汁全送進口內，香味倍增的同時，牛肉生熟情度剛剛好，好味。

鮮味十足的吞拿魚腩壽司配上蛋絲同吃，鮮甜味全數送進口內，超正。

最後甜品都好有質素，自家製日本和果子配上時令鮮果，還有綠茶紅豆燉蛋，每款不算太甜，為呢餐添上完美的句號。

由於酒精只得5度，又甜又香，讓大家能開懷暢飲呀！

同場加映

蔡展祺師傅全程炮製美食， 令大家都大飽口腹。

祺師傅曾任職多間著名日本料理店，擔任總廚。同時亦負責日本食品集團管理及研發生產項目。

地址：九龍大角咀通洲街103號 星淮酒店2樓

電話：98827789

本文章的原文標題為：《性價比高 廚師發辦Omakase》，最先於2024 年 10 月 21 日刊載於《V1周報》v1paper.com。技術支援： THISVO.com。