網絡熱話｜少婦帶兩女搭巴士與阿婆爭位坐爆罵戰　嘴藐藐動作成網民「表情包」

【橙訊】屯門一名帶著兩名女兒的少婦，日前在一輛巴士上與鄰座婆婆懷疑因為座位問題，雙方發生舌戰。兩人對罵的影片在網上討論區瘋傳，其中一句「返屋企點止公主病呀，皇后病添啊！你呢，太后病呀？」更引來網民熱議。大部分網民直指少婦的不是，「教壞細路」、「反面教材」，更有網民將女方在罵戰期間的動作製作成為「表情包」。

據網絡流傳的短片，甫開始已是少婦跟一名長者在對罵。其中手抱小女兒，與大女兒同坐的少婦在對罵期間表情豐富，扭身扭勢，全程擰頭擰髻奚落對方；罵戰另一主角、詞鋒同樣厲害的婆婆雖然一直沒有入鏡，但氣勢也不輸蝕，一句「你公主病就返屋企」，引來今次舌戰的重點。

在婆婆指罵少婦「公主病」後，少婦即連環爆金句指自己「返屋企點止公主病呀，皇后病添啊！你呢，太后病呀？」，接著語帶不屑地形容對方為井底之蛙，毫不猶豫地把對婆婆的不滿掛在臉上。

同車網民留言提供罵戰片段「前傳」

有同車網民留言講述事件的前因，表示「個媽咪（短褲少婦）想同個女坐埋一齊，跟住有個婆婆唔知坐咗落去，佢發癲Ｘ個阿婆，佢仲恐嚇個阿婆出屯門小心啲，有啲咁嘅老母真係羞家。可能講得唔清楚，架車本身爆晒，個媽咪本來抱住細女坐右手邊關愛座，個大女就企係左手到睇住架BB車，到兆康站就好多人落同上車。」

他續指「咁個媽咪一心諗住隔離個人落車就坐返去左手面同大女一齊坐（阿大女已坐咗落左手面），咁啱阿婆唔知頭唔知路就坐咗喺大女隔離。個媽咪就開始發癲，係到單打個婆婆，阿婆就講咗句：你哋想坐埋一齊呀？個媽咪即刻瘋狂Ｘ阿婆，話：頭先咪大大聲同我女講我一陣坐過去囉！咁阿婆就話：吓，我點知，我聽唔到。媽咪：咁Ｘ大聲你都聽唔到？跟住就如片中所述……」。不過，短片並無交代少婦何時坐回大女兒身旁。

網民稱少婦擰頭擰髻可成「表情包」

少婦在指罵期間不斷擰頭擰髻、嘴藐藐的吵架姿勢，引來大批網民留意，指「講嘢還講嘢，個頭可唔可以唔fing，個身可唔可以唔扭」、「講咪講囉，頭擰擰咁，唔通信心會大啲」，有人分析指，「心虛怕死又要壯膽，就要用呢啲行為去掩飾」。也有網民將其在罵戰動作製作成為「表情包」。

批少婦「教壞細路」「反面教材」

片段在網絡流傳後，引來不批網民評論。不過，大部分的都是批評少婦的行徑，形容她「教壞細路」、「反面教材」，認為「小事一樁都咁激，同埋個老母咀臉堅不討好，這樣身教小孩，下個這樣的人指日可待」、「做呀媽做到咁，2個囡將來有樣學樣」。

也有網民替婆婆抱不平，指「老人家真係唔會咁高意識㗎，佢地老咗反應遲鈍啲，聽又唔清楚睇又唔清楚，周圍發生咩事有時真係你兜口兜面話佢地知，佢地先會知㗎」、「個媽媽都認佢自己有『皇后病』，有咁嘅屯門街坊，真係不幸。婆婆本身都唔係有心坐錯位，咁都要鬧人，就算真係2母女分開坐，咪落車先Join（聚）番一齊囉！又唔係話分開咗坐就永遠都見唔到個女」。