熱話 | 天水圍13歲女中學生校園遭非禮　校方報警趕走家長　涉案男同學被捕

《東張西望》日前報道一宗13歲女童在天水圍校園慘遭男同學非禮案件。影片截圖

【橙訊】TVB《東張西望》日前報道一宗13歲女童在天水圍校園慘遭男同學非禮案件：男同學會拉扯受害女童入廁所，從後攬住她，更指下體「掂到後面」；女童情緒崩潰向家長哭訴，其後家長報案處理，不過之後校方卻反指家長「恐嚇」，更不斷催促女童學返學。警方指，涉案男童早前已被捕，獲准保釋候查。

身為泰國人的潘太接受《東張》訪問，透露揭發事件的經過：女兒放學時，想去7樓找老師拿功課，「有個男同學跟住佢，點知個男仔從後攬住佢，想拉佢入洗手間，一直扯佢隻手，佢一腳踢個男仔想開佢，跟住一直跑想離開。」

後來受害女童見到社工，不過或因為怕醜、感到害怕而未有向社工透露事件；當社工一走開，男同學繼續緊跟受害女童。當女童跑到校門，見到其他家長，即扮見到媽媽大叫：「媽媽，我喺呢度。」男同學亦立刻閃走。

受害女童立刻跑回家，當潘太一打開門，她立即情緒崩潰，當時剛巧潘太拿着手機，於是錄下與女兒的對話內容，女童在錄音中痛哭，當潘太問她：「佢捉住你隻手？」女童崩潰大叫：「係啊！佢捉住我！佢諗住拉我去第二個地方！」更透露男同學攬她攬了很久：「佢成日都咁做！」潘太表示：「佢（女兒）話男同學攬住佢條腰，個嘢（意指下體）掂到佢後面，佢覺得好驚。」

潘太錄下與女兒的對話內容。影片截圖

潘生與潘太立刻決定報警，案件交由CID跟進，錄口借時父母則在另一間房透過視象觀察整個過程，潘先生表示：「聽我個女講嗰事，原來唔只今次咁嚴重，之前都有幾次，一係樓梯一係廁所，同一個男學生。」男同學還會扮親吻受害女童、摸她的屁股。潘太形容：「佢一唔小心，個男同學就會趁機想搞佢。」而且懷疑非禮行為在去年5月已經發生，父母對此都感到相當痛心。

後來潘生潘太到女兒就讀的學校，打算通知校方已經報警，豈料卻反而被校方趕走，潘太說：「有個男老師同哋講，校長唔得閒，要等等。20分鐘後，就見到有警察係學校前面同校長傾偈，個警察即刻鬧我哋：『你兩個喺度做乜嘢啊！你哋返嚟學校做咩啊？走啦！仲唔走？』」

潘太講述事件經過。影片截圖

當時潘太感到非常害怕，在離開前向警察說：「我哋只係同校長講聲，如果你哋唔滿意，我哋走囉。」回到家中，潘太已接到警方電話：「佢鬧我哋，話我哋扮警察恐嚇學校。我哋就話『點扮啊？我只係通知校長，校方都知道我哋係家長。』佢叫我哋唔使再搵，跟住會去學校。」潘生潘太對於被警方驅趕、遭誤解為「恐嚇」，至今仍感到相當不解。相隔4個月，潘先生再向CID了解案件進展，對方表示「轉頭答你」，最後又再不了了之。

案件發生後，受害女童一直未有再返學，只以網課模式上堂，潘生表示：「（校方）係咁打電話畀我，搵個社工不停叫我個女返學，但個男同學仲返梗學，學校又冇處理佢。試過一次帶佢（女兒）返學，去到學校門口都話要走，之後斷斷續續收到學校電話，可以話係騷擾。」去年底校方更發出嚴重缺課通知書，指女童在沒有特別理由情況下，有機會會留班。潘生收到通知書感到好火滾：「你明知CID仲查梗，唔知進展點，學校係咁迫我個女返學，我可以做到啲咩呢？」