15歲學生親述與野豬搏鬥經過　要「好大力揈開佢」才能脫身

【橙訊】港鐵火炭站出口外今日有野豬出沒，兩人被咬傷，須送院治理。其中一名受傷的15歲姓余學生親述遇襲過程，指與野豬搏鬥半分鐘，最後要「好大力揈開佢」才能脫身。

姓余學生表示，當他剛到火炭站時已見到一頭野豬撞向一名女士的大腿，她被撞跌倒地，他上前欲驅趕牠，惟遭野豬攻擊，他形容搏鬥過程持續半分鐘，「最後都要好大力揈開佢，整到自己都受傷先掙脫到出嚟。」

他又指，野豬是沿馬場行到火炭站，沿途都有撞人，來到火炭站先撞跌一名女子，「個女仔嚴重好多，瞓低咗，我同個女仔只差半米距離，我隻手受傷，條褲畀佢（野豬）咬爆。」

對於第一眼見到野豬衝過來，他坦言「唔知點做好，同佢搏鬥咗幾次，野豬真係幾大力，好吃力掙扎，我用排球鞋袋打佢個頭，佢都係咬住唔放，最後都要好大力咁揈開佢，整到自己受傷先掙扎到出嚟。」

他又說，當時站內好多人，港鐵職員曾一度用圍欄圍住野豬在一個角落，牠曾平伏一段時間，「當時好多途人影相及圍觀，可能佢受咗某啲刺激突然衝出嚟，可能係聲音或光線刺激。」